ಕುಲಪತಿಗಳ ಸಂದೇಶ

“ಅರಿವು ಅಂತರಗಂಗೆ” ಎಂಬ ಘೋಷವಾಕ್ಯವನ್ನು ಹೊತ್ತ ಬೆಂಗಳೂರು ಉತ್ತರ ವಿಶ್ವವಿದ್ಯಾಲಯದ ಕುಲಪತಿಯಾಗಿ ನಿಮ್ಮೆಲ್ಲರಿಗೂ ಪ್ರೀತಿಯ ಶುಭಾಶಯಗಳು. ಒಂದೆಡೆ ಗಿಜಿಗಿಜಿ ಬೆಂಗಳೂರು, ಇನ್ನೊಂದು ಕಡೆ ತಮಿಳು-ತೆಲುಗು ನಡುವಿನಿಂದ ಅಚ್ಚಕನ್ನಡ ಪ್ರದೇಶದ ಭೂರಮೆಯಾಗಿ ಸಿಂಗಾರಗೊಡು ಕಂಗೊಳಿಸುವ ನಮ್ಮ ವಿಶ್ವವಿದ್ಯಾಲಯ ಈಗಿನ್ನೂ ಅಂಬೆಗಾಲಿಡುತ್ತಿದೆ.
ಕೋಲಾರ, ಚಿಕ್ಕಬಳ್ಳಾಪುರ, ಬೆಂಗಳೂರು ಗ್ರಾಮಾಂತರ ಹಾಗೂ ಬೆಂಗಳೂರು ನಗರದ ಕೆಲವು ಭಾಗಗಳನ್ನು ಒಳಗೊಂಡು ರಚಿತವಾಗಿರುವ ಬೆಂಗಳೂರು ಉತ್ತರ ವಿಶ್ವವಿದ್ಯಾಲಯ ೨೭೫ ಕಾಲೇಜುಗಳ ಸುಮಾರು ಒಂದು ಲಕ್ಷ ವಿದ್ಯಾರ್ಥಿಗಳ ಭವಿಷ್ಯವನ್ನು ಕಟ್ಟಿಕೊಡುವ ದೇಗುಲ. ಸಹಸ್ರಾರು ವಿದೇಶಿ ವಿದ್ಯಾರ್ಥಿಗಳ ಆಡೊಂಬಲ. ಹಿಂದುಳಿದ, ಬಡತನದ ಹಿನ್ನಲೆಯ, ಉಚ್ಚ ಶಿಕ್ಷಣ ಗಗನಕುಸುಮವಾಗಬಹುದಾಗಿದ್ದ ಬಹು ಸಂಖ್ಯೆಯ ವಿದ್ಯಾರ್ಥಿಗಳಿಗೆ ಆಶಾಕಿರಣ. ಈ ಭಾಗದಲ್ಲಿ ತಲೆ ಎತ್ತುತ್ತಿರುವ ಹಲವಾರು ಉದ್ಯಮಗಳಿಗೆ ಮಾನವ ಸಂಪನ್ಮೂಲದ ಕಣಜ.

ಬೆಂಗಳೂರು ಉತ್ತರ ವಿಶ್ವವಿದ್ಯಾಲಯ ಕಡಿಮೆ ಅವಧಿಯಲ್ಲಿ ಹೆಚ್ಚಿನ ಸಾಧನೆ ಮಾಡುವ ಧಾವಂತ ಹೊಂದಿದೆ. ಅಮರಾವತಿಯಲ್ಲಿ ಸುಂದರವಾದ ಕ್ಯಾಂಪಸ್ ನಿರ್ಮಾಣವಾಗಬೇಕಾಗಿದೆ. ವಿದ್ಯಾರ್ಥಿಗಳ ಸರ್ವತೋಮುಖ ಅಭಿವೃದ್ಧಿ ನಮ್ಮ ಗುರಿಯಾಗಿದೆ. ನಿಜ, ಯಾವುದೇ ವಿಶ್ವವಿದ್ಯಾಲಯ ಆರಂಭಿಕ ದಿನಗಳಲ್ಲಿ ಎದುರಿಸುವ ಸವಾಲುಗಳೆಲ್ಲವೂ ಬೆಂಗಳೂರು ಉತ್ತರ ವಿಶ್ವವಿದ್ಯಾಲಯವನ್ನು ಕಾಡುತ್ತಿದೆ. ಆದರೆ ನಿಮ್ಮೆಲ್ಲರ ಸಹಕಾರದೊಂದಿಗೆ ಉತ್ತಮ ಶೈಕ್ಷಣಿಕ ವಾತಾವರಣ ನಿರ್ಮಿಸುವ, ಜೊತೆಗೆ ವಿಶ್ವವಿದ್ಯಾಲಯವನ್ನು ಕೇವಲ ಪದವೀಧರರನ್ನು ಉತ್ಪಾದಿಸುವ ಕಾರ್ಖಾನೆಯಾಗಿಸದೇ ಮುನುಷ್ಯರ ನಿರ್ಮಾಣದ ವ್ಯವಸ್ಥೆಯಾಗಿಸುವುದು ನಮ್ಮ ಗುರಿಯಾಗಿದೆ. ನಮ್ಮೆಲ್ಲ ಕೆಲಸಗಳಲ್ಲಿ ಮಾನವತೆಯ ಸ್ಪರ್ಶ, ಪ್ರಜ್ಞಾವಂತಿಕೆಯ ಎಚ್ಚರವೂ ಇರಲಿದೆ. ಬೆಂಗಳೂರು ಉತ್ತರ ವಿಶ್ವವಿದ್ಯಾಲಯದ ಸಂಪರ್ಕಕ್ಕೆ ಬಂದಿದ್ದಕ್ಕೆ ಧನ್ಯತಾ ಭಾವವು ನಿಮ್ಮದಾಗಲೆಂಬ ಸದಾಶಯಗಳೊಂದಿಗೆ.

ಪ್ರೊ. ನಿರಂಜನ